عشنا ياما عشنا ولسه في العمر بقية بس مش عارفين حتبقى ( البقية في حياتك ) ولا البقية تأتي ؟ عموماً مش فارقة كتير المهم احنا حنتصالح مع ( الإخوان ) ولا كله كلام ؟ انا شخصياً شايف اننا في طريقنا للتصالح والشواهد كتيرة وكمان الأيام دي التفجيرات والحمد لله بقت شبه مش موجودة وياريت محدش يقوللي إن وزير الداخلية الجديد هو اللي نشيط وقضى عليها , لأ دا ممكن يكون قضى عليها بالتفاوض مش بالسيطرة خصوصاً وانه من الضباط ( المحنكين ) بجهاز أمن الدولة قبل تنصيبة وزيراً للداخلية وممكن يكون جاى وزير علشان تأدية هذه المهمة من الدرجة الأولى وكمان رجع كل الضباط اللي الإخوان خرجوهم من الجهاز طبعاً علشان الضباط دول عارفين طبيعة تفكير وحركة أعضاء الجماعة وعارفين الناحية ( السيكولوجية ) ليهم وكيفية اللعب على الأوتار الحساسة عندهم وكمان عارفين ازاى يكسبوا جولات جيدة من التفاوض معهم خصوصاً وإنهم عارفين إن الإخوان ( بكام تاخد ايه ) عموماً مش حنسبق الأحداث وحنقول إن الكلام ده ( افتكاسات مؤكدة ) من واحد ما نمش كفاية ولما نام كانت ( طيره ) عريانة مش الموضوع انها كانت عريانة المهم انه حلم أحلام الواقع الحالي وصحي يغني ( الدنيا توهه وزحام فيها البشر أجناس .. مولفة ناس على ناس وباعدة ناس عن ناس ) يعني الألفة دي حاجة كويسة بس يا ترى هل ألفة من عند الله أم ألفة من صنع البشر ؟ دي تبقى أيام سودة لو من صنع البشر بمعنى اننا عدنا لعصر المساومات والصفقات السياسية المشبوهة وكله على حساب المواطن البسيط المغلوب على أمره وتقسيم تورتة الوطن على الفصائل السياسية , عموماً نحن في انتظار الإعلان عن مصالحة حقيقية مع الإخوان سواءً كانت صريحة أو مقنعة في جميع الأحوال نوصل ان توقعاتنا ( صح ) مش نوم من غير غطا وطبعاً الصيف داخل علينا وكله حيبقى من غير غطا وكمان اللي بيحصل الأيام دي في الكواليس ما هو إلا حقيقة وليس خيال !!!!