الخميس الموافق 24 - يونيو - 2021م

مدير مكافحة العدوى بصحة السويس يجيب على الأستفسارات حول ” الفطر الأسود” 

مدير مكافحة العدوى بصحة السويس يجيب على الأستفسارات حول ” الفطر الأسود” 

كتب ايمن يوسف حمدان

 

 

فى اطار اهتمام قيادات الصحه بنشر الوعى الصحى المجتمعى وتحت اشراف دكتور اسماعيل الحفناوى وكيل وزاره الصحه بالسويس فقد قام الدكتور

اسلام سيد مدير اداره مكافحه العدوى بالمديريه عن الفطر الاسود عباره عن طرح الاسئله والاجابه عليها و التى تدور فى اذهان المواطنين

 

_هل الفطر ده كان موجود قبل كده ولا هو حاجة جديدة؟

الفطر الأسود موجود من زمان و معروف و هو مش حاجة جديدة.

_ طب الفطر الأسود موجود فين؟
الفطر ده موجود في البيئة حوالينا و خاصة في التربة

طرق الإصابة بالفطر الأسود بتكون ازاي؟

_طريقة العدوى بالفطر الأسود بتكون عن طريق التلامس او استنشاق الحويصلات الفطرية الموجودة بصورة طبيعية في البيئة المحيطة بينا.

 

 

_ مين اللي بيصاب بعدوي الفطر الأسود؟
عدوى الإصابة بالفطر الأسود من نوع في العدوى اسمه العدوى الانتهازية، و هي العدوى اللي بتحصل لما تكون مناعة الجسم ضعيفة و مش بتقدر تقاوم الميكروبات بصفة عامة، و الإصابة بالفطر الأسود نادرة الحدوث في الأشخاص العاديين ولكنها بتحصل لما مناعة الجسم تكون ضعيفة ياما عن طريق اخد جرعات عالية من الكورتيزون او نتيجة اخد جرعات عالية من المضادات الحيوية او الأدوية بصفة عامة اللي بتقلل مناعة الجسم يعني إساءة استخدام المضادات الحيوية و الكورتيزون دون إشراف طبي واللي بالتالي بتقلل المناعة، و في بعض حالات الإصابة بالسكر اللي بيكون مش متظبط لفترات طويلة، أو في مرضى زراعة الأعضاء أو في مرضى ضعف المناعة.

– هل عدوى الإصابة بالفطر الأسود معدية بين الأشخاص؟
لا الإصابة بالفطر الأسود غير معدية بين الأشخاص يعني مش معدي من شخص لآخر.

 

 

– هل في علاقة بين الإصابة بالكورونا و الإصابة بالفطر الأسود؟
العلاقة هتكون مناعة الجسم اللي بتضعف نتيجة الإصابة بالكورونا و نتيجة استخدام مضادات حيوية او كورتيزونات بدون إشراف طبي، ففي الحالة دي هيكون من عوامل الخطورة للإصابة باي عدوى أخرى انتهازية نتيجة ضعف مناعة الجسم و اللي من ضمنها الفطر الأسود، فهي علاقة غير مباشرة نتيجة ضعف المناعة.

 

 

– هل الإصابة بالفطر الأسود ليها علاج دوائي؟
بالتأكيد التشخيص المبكر هيكون له دور كبير في العلاج و له طبعا علاج دوائي و في علاج جراجي للحالات المتأخرة اللي بتتشخص متأخر، و عشان كده بنأكد على الإشراف الطبي للعلاجات المستخدمة في الكورونا و غيرها من الأمراض.

– اية طرق الوقاية من الفطر الأسود؟
اولا زي ما قولنا انها غير معدية من شخص لآخر و ممكن نقلل من الانتشار عن طريق الوقاية من الكورونا :
تلقى تطعيم الكورونا، تجنب التجمعات ووالتباعد المجتمعي و غسل الأيدي و تطهير ها باستمرار و استخدام الماسك و تنظيف الأسطح و تطهير ها.

لازم استخدام المضادات الحيوية و الكورتيزون يكون تحت إشراف طبي.

ويجب على مريض السكر الحفاظ على نسبه السكر بالدم بقدر الامكان .

 

 

و اخيرا تؤكد مديريه الصحه بالسويس على أهمية ان يكون العلاج للكورونا او اي أمراض اخرى تكون تحت إشراف طبي و عدم تكرار روشتات الغير او صرف علاج و أخذه من نفسنا.

 التعليقات

 أخبار ذات صلة

[wysija_form id="1"]
إعلان بنك مصر

إعلان بنك مصر

جميع الحقوق محفوظة لجريدة البيان 2015

عدد زوار الموقع: 51391094
تصميم وتطوير