الإثنين الموافق 12 - أبريل - 2021م

تعرف علي رسالة نائب مدير مستشفى النجيلة للعزل.. بعد اصابته بفيرس كورونا

تعرف علي رسالة نائب مدير مستشفى النجيلة للعزل.. بعد اصابته بفيرس كورونا

كتب أحمد ماهر

رسالة من الدكتور محمد علام نائب مستشفي النجيلة
انا بخير لكل زمايلى وأهلى والناس اللى بعتولى وحاولوا يتصلوا بيا يطمنوا عليا اليومين اللى فاتوا بعتذر مكنتش قادر ارد عليكم ناس سالتنى عن الاعراض مبدئيا الاعراض زى ماتكلمت من شهرين بتختلف من شخص لشخص مينفعش اقول انا عندى كذا وكذا لان استجابه جسمى مش زى جسمك لكن هنعتمد على الدراسات اللى اتعملت على الالاف الحالات وشفناها فى الحالات اللى كانت عندنا وللاسف فى نفسنا

اولا الاعراض
أشهرها ارتفاع بدرجه الحرارة ودى فى حوالى ٨٠ ل ٩٠ ٪ من الحالات تستمر لايام وممكن تختفى وترجع تانى
تانى اشهر الاعراض سعال جاف فى حوالى ٦٠٪ من الحالات
واخر حاجه الم بالجسم وده فى حوالى ٤٠ ل ٥٠ ٪ من الحالات

يعنى ممكن الموضوع يبدء بكل الاعراض او عرض واحد او حتى بدون اعراض نهائى

بعد كده المرحله الثانيه ضيق بالتنفس وارتفاع فى معدل التنفس وده خلال اسبوع من بدايه الاعراض او اقل حسب مناعه الشخص وده بدايه الالتهاب الرئوي ومش بيحصل لكل الحالات ولو محصلش فانت خلاص بتخف
لكن لما بيحصل بيبدء يزيد بسرعه خلال يومين فقط بيكون التهاب رئوى شديد وبيحتاج لجلسات واكسجين وتدخلات أخرى
وبعد كده بيومين فشل بوظائف التنفس وبتصل للوفاه لو متحسنش

ده تسلسل المرض طبقا لاخر تحديث للصين على عدد الحالات اللى عندها وكمان CDC وغيرهم فى اجماع على الاعراض دى باختلاف النسب بفروق طفيفه اى اعراض اخرى فهى نادره جدا وتكاد لا تحدث زى الاحتقان بالحلق والرشح واضطرابات المعده

ثانيا امتا اروح اكشف ؟؟ لو بدئت ارتفاع درجه الحراره وسعال اروح اكشف هيتعمل تحاليل واشعه وبعض الاسئله عن اماكن تواجدك اخر فتره واختلاطك بمرضي ايجابيين او مشتبه فيهم او دخولك مستشفيات لو حصل ان اى حاجه من دول تخلى الطبيب يشك هيتعملك مسحه لو لا فانت مفيش عندك حاجه

وارد جدا انك فى اى مرحله من دول تخف بدون اعراض او باعراض بسيطه او باعراض شديده او حتى فى مرحله حرجه

علشان كده المخالطين لحاله ايجابيه بيتقالهم يقعدوا فى البيت لمده ١٤ يوم لو مظهرش اعراض فانت كده اما كان عندك المرض بدون اعراض نهائى وخفيت او معندكش اصلا
انما لو ظهر اعراض حتى لو بسيطه درجه حراره او سعال فانت لازم يتعملك مسحه لان كده انت مشتبه فيه مش مخالط

انما انا مريت بايه فللاسف لانى مدخن على بسيط والحمد لله بطلت لما تعبت فالاعراض كانت شديده شويه وكان فى التهاب رئوى بس بدء يخف وحاليا ارتفاع بدرجه الحراره متوقع وبخف كلها ايام وابقى سلبى (التدخين مش بيحمى)

مردتش اتصور قبل ماعرف اضحك لانكم عرفتونى متفائل مينفعش تشوفونى متشائم واختتم رسالته بقوله
بيكم انتم الوباء هينتهى والله بس ساعدوا بعض والتزموا بتعليمات وزاره الصحه ووعوا اللى مش فاهم

 التعليقات

 أخبار ذات صلة

[wysija_form id="1"]

جميع الحقوق محفوظة لجريدة البيان 2015

عدد زوار الموقع: 49391048
تصميم وتطوير