الخميس الموافق 18 - أكتوبر - 2018م

القيمة الحقيقية للنقود / بقلم محمد محرز

القيمة الحقيقية للنقود / بقلم محمد محرز

تاريخ وقيمة النقود و التضخم
ايه هو سعر العملة الحقيقي؟
من فترة كتبت بوست يعني ايه عملة او نقود اللينك اهه للي حابب يراجعه

الكلام ده مش للمتخصصين دا كلام للتبسيط
العملة ليها سعرين طول الوقت
سعر حقيقي … وسعر متداول
السعر المتداول او سعر البنك هو السعر اللي بتحدده البنوك المركزية واللي بيتعلن عنها في النشرات
اما السعر الحقيقي فهو سعر العملة مقابل الناتج القومي
ودي حسابات ورقية بيحسبها متخصصي البنوك المركزية وبناءاً عليها بيحاولوا يقربوا السعر المتداول من السعر الحقيقي باكبر قدر ممكن مع مراعاة النتائج الاجتماعية والاقتصادية اللي ممكن تنتج عنها
يعني مثلا سعر اليوان الصيني الحقيقي اكبر من سعره المتداول انما البنك المركزي الصيني قرر انه يسيب سعره منخفض علشان ده في صالح نشاط التصدير
يعني ايه العملة مقابل الناتج القومي
هنبسط الموضوع شوية
تعالوا نتخيل ان الدولة كلها عبارة عن
شخصين
واحد معاه عشر ورقات من العملة
وواحد بيصنع ثلاجات
(مع افتراض ان مفيش اي سلع تانية ولا فيه سوق خارجية)
القيمة الحقيقية للعشر ورقات نقود مع الشخص الاول بيساووا كام
قيمتهم الحقيقية = قيمة الثلاجات اللي بيصنعهم الشخص التاني
لو الشخص الثاني قدر يصنع عشر ثلاجات
بكده هيبقى سعر العملة مرتفع جدا … ليه؟
لان كل ثلاجة هيكون ثمنها ورقة عملة واحدة
طيب لو افترضنا ان الشخص التاني كسول او خبرته قليله وما قدرش ينتج غير ثلاجة واحدة؟؟
قيمة ورقات العملة هتبقى ايه؟؟
هيبقى الثلاجة الواحدة ب العشر ورقات عملة
وبكده هيبقى سعر العملة منخفض جدا
لان السوق مافيهوش غير ثلاجة واحدة بس وفيه عشر ورقات عملة
اذن قيمة النقود الحقيقية بحددها بشكل كبيييير قيمة الناتج القومي لاصحاب العملة دي
كل مايكون الناتج اكبر كانت قيمة العملة اعلى
(ملحوظة مهمة سعر العملة مرتفع او منخفض مش دليل على قوة الاقتصاد —- الدليل على قوة الاقتصاد هو الثبات النسبي لسعر صرف العملة)
يعني سعر العملة لايزيد ولا ينخفض لاطول وقت ممكن ولما يتغير يكون التغير بنسبة قليلة — كده نقول ان اقتصاد الدولة دي قوي
وافتكر دايما ان سعر الجنيه اعلى من سعر عملة الصيين واليابان وروسيا وعملة الكويت اعلى من عملة امريكا واوروبا وبريطانيا وعملة البحرين اعلى من عملة السعودية
في مثالنا السابق
لما كان الشخص الثاني نشيط جدا وبينتج عشر ثلاجات وسعر العملة مرتفع جدا
ممكن يحصل والبنك المركزي يطبع 90 ورقة عملة جديدة ويعطيها للشخص الاول
وقتها ايه النتيجة؟؟؟
هيكون مع الشخص الاول 100 ورقة عملة
وهيكون ثمن كل ثلاجة 10 ورقات وتنخفض سعر العملة
وفيه دول كتييير بتتعمد تطبع عملات كتير وتخفض سعر عملتها لاسباب اقتصاددية زي ماقولنا الصين على رأس الدول دي
(الثبات النسبي لسعر صرف العملة)
————–
التضخم بقى هو ان السنة اللي فاتت العشر ورقات عملة اللي مع الشخص الاول كانوا بيشتروا عشر ثلاجات … لكن السنادي العشر ورقات مش بيشتروا غير 9 ثلاجات يبقى قيمة العشر ورقات نقود انخفضت ب 10%
انخفاض قيمة النقود الحكاية دي طبيعية وبتحصل طووول الزمن منذ بدء الخليقة
لكن فيه نسبة مقبولة ونسبة نعتبرها ازمة
طول ما نسبة التضخم اقل من نسبة النمو في الاقتصاد فدا عادي
من هنا نيجي لنقطة مهمة وهي امتى البنك المركزي يطبع فلوس؟
البنك المركزي بيطبع فلوس لاربع اسباب
سببين منهم طبيعيين ومافيهمش اي مشكلة وسبب سلبي وسبب تحكمي
السبب الاول هو طباعة نقود لمجاراة النمو اللي بيحصل في الاقتصاد والمجتمع
السبب الثاني هو طباعة نقود لمواجه نسبة التضخم في السوق
السبب الثالث السلبي هو لتغطية عجز موازنة الدولة
السبب الرابع هو طبع عملات للتحكم في قيمة العملة في السوق
نقول امثلة على الاربع اسباب
السبب الاول
نتخيل ان الشخص الثاني في مثالنا السنة الجديدة قدر ينتج 12 ثلاجة بدل 10 ثلاجات؟
كده سعر العملة هيرتفع لان الاول معاه 10 ورقات عملة فقط زي ماهو وهيحصل كساد في السوق
يبقى وقتها لازم البنك المركزي يدي للشخص الاول ورقتين عملة علشان يبقى معاه 12 ورقة عملة وبكده يفضل سعر الثلاجة ورقة عملة واحدة مقابل كل ثلاجة
ونقول ان نسبة نمو السوق 20% يبقى نطبع نقود 20% من اللي موجودة في السوق
السبب الثاني
هو ان الشخص الثاني في السنة الجديدة مش راضي يبيع العشر ثلاجات بسعر العشر ورقات عملة وشايف ان سعرهم اعلى من كده وبيقول للشخص الاول انا ممكن ابيعلك بالعشر ورقات 9 ثلاجات فقط!!!
هنا لازم يتدخل البنك المركزي ويطبع ورقات عملة جديدة ويعيطها للشخص الاول علشان يقدر يشتري الثلاجة العاشرة
وبكده يبقى نسبة التضخم 10% والبنك هيطبع 10%
السبب الثالث بتحصل في الازمات الكبرى خصوصا في الحروب الدولة بتطبع عملات كتير علشان تغطي مصاريف الحكومة واشهر مثال على كده اللي حصل في المانيا وقت الحرب العالمية الثانية
السبب الرابع بقى هو لو البنك المركزي ماعجبوش سعر العملة في السوق وعاوز يتحكم فيها فهو عنده عدة ادوات للتحكم في سعر العملة احد الادوات دي هو طباعة اوراق نقدية جديدة وطبعا نسبة الفائدة
دا مثال للتبسيط والشرح
انما في الواقع بقى الناتج القومي مش ثلاجة بس
انما تصنيع وزراعة وتجارة وخدمات وسياحة وتحويلات من الخارج واي حاجة تدخل فلوس للدولة

محمد محرز عبد العليم

 تعليقات الفيس بوك

 أخبار ذات صلة

[wysija_form id="1"]

انت لاتستخدم دايناميك سايدبار

جميع الحقوق محفوظة لجريدة البيان 2015

عدد زوار الموقع: 24944612
تصميم وتطوير
WP Facebook Auto Publish Powered By : XYZScripts.com